სალომე ზურაბიშვილი: საქართველოსთვის ძალიან დიდი პატივია, რომ აქ ტარდება ძალოსნობის ევროპის ჩემპიონატი
სალომე ზურაბიშვილი: საქართველოსთვის ძალიან დიდი პატივია, რომ აქ ტარდება ძალოსნობის ევროპის ჩემპიონატი
15:11 06.04.2019
საქართველოს პრეზიდენტმა სალომე ზურაბიშვილმა ბათუმში ძალოსნობაში ევროპის ჩემპიონატი ოფიციალურად გახსნა.

საქართველოს პრეზიდენტი, ბათუმის ახალ სპორტის სასახლეში, ძალოსანთა საქართველოს ნაკრებს მიესალმა და აღნიშნა, რომ საქართველოსათვის დიდი პატივია ძალოსნობის ევროპის ჩემპიონატის - „ბათუმი 2019-ის“ მასპინძლობა.

სალომე ზურაბიშვილის განცხადებით, ეს იმის ნიშანია, რომ საქართველომ ძალოსნობის სპორტულ სახეობაში, და არა მხოლოდ ამ სახეობაში, საერთაშორისო სპორტული თანამეგობრობის ნდობა მოიპოვა.

,,ვფიქრობ, ეს არის დიდი დღე ბათუმისთვის და არის დიდი დღე საქართველოსთვის. ძალიან დიდი პატივია საქართველოსთვის, რომ აქ ტარდება ძალოსნობის ამ წლის ჩემპიონატი. მსოფლიოს სპორტული სამყაროს ნდობის მოპოვება ჩვენი წარმატებული სპორტსმენების დამსახურებაა, რომლებსაც მინდა მივულოცო ამ შეჯიბრის დაწყება და წარმატება ვუსურვო ჩემპიონატის მონაწილე ყველა სპორტსმენს" - აღნიშნა სალომე ზურაბიშვილმა.

საქართველოს პრეზიდენტი თავის გამოსვლაში ქალი სპორტსმენის, თათია ლორთქიფანიძის საკითხსაც შეეხო.

,,მე, როგორც ქალი პრეზიდენტი, არ შემიძლია არ ვიყო აღშფოთებული იმის გამო, რომ ერთ-ერთი ჩვენი გამორჩეული ჩემპიონი თათია ლორთქიფანიძე, გაურკვეველი მიზეზების გამო,ვერ მონაწილეობს ამ ჩემპიონატში და იმედი მაქვს, რომ ეს არ უკავშირდება ქალის მიმართ დისკრიმინაციას" - განაცხადა სალომე ზურაბიშვილმა.
ბეჭდვა