ადამიანის უფლებათა ევროპულმა სასამართლომ საქართველოს ყოფილი ენერგეტიკის მინისტრის დავით მირცხულავას საქმეზე − „მირცხულავა საქართველოს წინააღმდეგ“ − განჩინება გამოიტანა.

2015 წლის 3 აპრილს, საქართველოს მთავრობამ მომჩივნის მიმართ ადამიანის უფლებათა ევროპული კონვენციის ზემოაღნიშნული მუხლების დარღვევა აღიარა და მომჩივანს კომპენსაციის სახით 5 000 ევრო შესთავაზა.

2015 წლის 6 მაისს მომჩივანი საქართველოს მთავრობის მიერ შეთავაზებულ წინადადებას სრულად დაეთანხმა.

მხარეთა შორის მიღწეული შეთანხმების გათვალისწინებით, სტრასბურგის სასამართლომ აღნიშნული დავა განსახილველ საქმეთა ნუსხიდან ამორიცხა.

საქართველოს ყოფილმა ენერგეტიკის მინისტრმა დავით მირცხულავამ ევროპულ სასამართლოს საჩივრით 2004 წლის 1-ელ აპრილს მიმართა.

სტრასბურგის სასამართლოს წინაშე მომჩივანი საქართველოს ყოფილი ენერგეტიკის მინისტრი დავით მირცხულავა, მის მიმართ ევროპული კონვენციის მე-3 მუხლის (წამების აკრძალვა) დარღვევას ასაჩივრებდა, რამდენადაც პატიმრობის პერიოდში მას არასათანადო მკურნალობა გაეწია; ასევე ის მე-5 მუხლის (თავისუფლებისა და უსაფრთხოების უფლება) დარღვევას ასაჩივრებდა, რამდენადაც მისი დაკავება უკანონოდ მოხდა და აღკვეთის ღონისძიების სახით პატიმრობა შესაბამისი დასაბუთების გარეშე შეეფარდა.

გარდა ამისა, მომჩივანი მიუთითებდა, რომ საქართველოს იმდროინდელმა პრეზიდენტმა მიხეილ სააკაშვილმა საკუთარი განცხადებებით, კონვენციის მე-6 მუხლის (საქმის სამართლიანი განხილვის უფლება) მოთხოვნათა საწინააღმდეგოდ, მომჩივნის უდანაშაულობის პრეზუმფცია დაარღვია.